Rimbursimi i ilaçeve, përfaqësuesi i Urdhrit të Farmacistëve: Shuma e caktuar nga qeveria nuk mjafton

Qeveria shqiptare vendosi që të rimbursojë deri diku shpenzimet për barnat dhe ilaçet për kurimin nga Covid-19. Nga rimbursimi i barnave anti-covid do të përfitojnë pacientët që do të kalojnë virusin në gjendje të lehtë dhe të mesme.

Shteti garanton shumat 1650 dhe 10900 lekë, edhe pse kostot për këtë kategori të sëmurësh mund të jenë më të larta. Sekretari i Përgjithshëm i Urdhrit të Farmacistëve, Dëfrim Goma, gjatë një intervistë me gazetaren Ilva Tare në Euronews Albania tha se pacientët mund të përfitojnë nga skema e rimbusrimit, pasi rezultati i testit të Covid-19 të konfirmohet nga ISHP-ja.

“Receta me rimbursim përcaktohet pasi të jetë konfirmuar nga institucionet shëndetësore publike, që do të thotë se nëse një pacient, që të konfirmohet pozitiv duhet të ketë përgjigjen pozitive nga ISHP-ja. Që zyrtarisht një person  quhet i prekur me me covid, duhet që testi i bërë në një laborator privat të konfirmohet nga ISHP-ja. Skema e rimbursimit është një skemë shumë e mirë, dhe është edhe kërkesë e jona”, tha ai.

Ai tha se shuma e rumbursimit që ka përcaktuar qeveria për të ndihmuar të prekurit nga cornavirus nuk mjafton.

“Shumë që është vënë mund të diskutohet, dhe natyrisht që është shumë e papërfillshme dhe nuk e mbulon. Farmacitë kanë të drejtë të tregtojnë pajisje mjekësore. Si forma e lehtë dhe ajo e mesme kanë një kosto reale dhe  është relativisht më e lartë, ose tre deri në katër herë më shumë se sa kjo pretendohet”, tha ai.

Sekretari i Përgjithshëm i Urdhrit të Farmacistëve tregoi me shifra konkrete për çmimin e barnave për pacientët, të cilët janë infektuar dhe po kalojnë një formë të lehtë ose të mesme të Covid-19:  “Shkon rreth 6 mijë lekë forma e lehtë, ndërsa forma e mesme shkon në rreth 30 mijë lekë, dhe që përfshihen dhe barnat që përdoren tek forma e lehtë. Pacientët po mjekohen në shtëpi edhe me barna të tjerë edhe me antibiotikë. Kjo shumë që është vënë nuk mjafton bazuar në informacionet me realitetin se çfarë ndodh Ne kemi bërë një rimbursim të pjesshëm dhe jo të plotë”, theksoi ai.

Në fund ai ftoi farmacistët të mos tregtojnë ilaçe të pautorizuara dhe që janë të dëmshme për shëndetin e qytetarëve.

“Në çdo moment thirrja ndaj farmacistëve është: të dashur kolegë, ushtrojeni profesionin e farmacistëve, zbatoni legjislacionin dhe ndihmojini njerëzit”, theksoi z. Goma. 

Ndiqni intervistën e plotë:

Lexoni gjithashtu:

Dy skemat e rimbursimit të ilaçve për pacientët e prekur nga Covid-19