Bujqësia gjatë pandemisë, ministri Çuçi: Sektori më i suksesshëm, patëm rritje eksportesh

Ministri i Bujqësisë, Bledi Çuçi tha gjatë një interviste për gazetaren Ilva Tare në Euronews Albania se sektori i bujqësisë “ishte më i suksesshmi” gjatë periudhës së pandemisë dhe jo vetëm nuk pësoi rënie, por pati tregues rritës, sidomos në eksporte.

“Mendoj se bujqësia ka qenë sektori më i suksesshëm që ka performuar në ekonominë shqiptare, fjalët sukses dhe pandemi mund të rrinë bashkë? Po, ja që rrinë,” – u shpreh ministri Çuçi duke këmbëngulur se rritja e eksporteve, sidomos e fruta-perimeve, ka qenë vendimtar në një bilanc më pozitiv për bujqësinë.

“Besoj se [në vazhdim] do ta ulim deri në një me tre bilancin tregtar, për ta kuptuar më mirë, në vitin 2012 ka qenë një me shtatë bilanci tregtar,” – shtoi më tej ministri i Bujqësisë duke këmbëngulur se bujqësia ka qenë sektori i vetëm me rritje gjatë nëntë muajve të fundit.

Gjatë intervistës, ministri hodhi poshtë pretendimet se situata e bujqësisë është e rënduar. Ai pretendoi se politikat e ndjekura nga qeveria me subvencionime dhe taksa më të ulëta për përpunuesit ka bërë që të shtohet prodhimi.

I pyetur për pretendimet dhe ankesat e fermerëve, Çuçi relativizoi duke thënë se ankesa dhe shqetësime ka kudo. Për këtë ai mori si shembull edhe Francën, ku sipas tij ka edhe protesta të mëdha për “shqetësimet e fermerëve”.

Ndiqni intervistën e plotë: