Akuzat e Bashës, Ministria e Shëndetësisë: Cenojnë rëndë dinjitetin e bluzave të bardha

Përmes zv. ministrit Albert Nikolla, Ministria e Shëndetësisë thotë se akuzat e bëra nga z. Basha nuk janë të vërteta, dhe kjo sipas tyre, cenon dinjitetin dhe nxit veprimet agresive kundrejt mjekëve.

“Akuza e lëshuar mbrëmë nga Kryetari i Partisë Demokratike, Z. Lulzim Basha, për fshehje të qëllimshme të numrave të qytetarëve që kanë ndërruar jetë, cenon rëndë dinjitetin e mjekëve tanë dhe nxit agresivitetin ndaj tyre, në një kohë kur ata janë aseti më i paçmueshëm që Shqipëria ka në përballjen me pandeminë. Është e paimagjinueshme që ndërkohë që qeveria ka bërë gjithçka për paralizimin e burimeve të dhunës fizike ndaj mjekëve në këto vite, sot opozita ta stimulojë këtë dhunë me një akuzë të tillë e cila fajëson direkt ata, sepse janë mjekët dhe askush tjetër që përcaktojnë shkaqet e fataliteteve në kartelat mjekësore të pacientëve”, tha ai.

Ministria e Shëndetësisë deklaratat e Bashës i cilëson si “hamendje dhe tymnaja toksike”.

“Ministria e Shëndetësisë dhe Mbrojtjes Sociale e rifton zotin Lulzim Basha dhe këdo tjetër për llogari të tij, që të vijë e të ballafaqojë me autoritetet shëndetësore çdo hamendje, përpara se sa të shpërndajë të tilla tymnaja toksike për shpirtrat e mendjet e qytetarëve”, tha ai.

Pretendimet e Bashës për fshehjen e numrave të vdekjeve nga Covid-19 janë kritikuar nga kryeministri Edi Rama, por edhe nga vetë mjekët.

Shefja e Spitalit Infektiv në QSUT, Najada Çomo tha se nëse të tilla akuza përsëriten, atëherë do të thirret prokuroria, që të hetojë kartelat e personave që kanë ndërruar jetë.

Lexoni gjithashtu: 

Akuzat e Bashës për fshehje të vdekjeve nga COVID, përgjigjen mjekët: Tronditëse, do thërrasim prokurorinë

Akuza e Bashës për shifrat e vdekjeve nga COVID, Rama: Cënoi integritetin e mjekëve