Qëlloi me armë zjarri në ajër, policia arreston 26-vjeçarin në Burrel

Policia e Matit ka arrestuar 26-vjeçarin me iniciale S.N, i cili ishte shpallur në kërkim.

Uniformat blu bëjnë me dije se 26-vjeçari është arrestuar, pasi më 1 shtator të këtij vitit qëlloi me armë zjarri në ajër në qytetin e Burrelit. Ngjarja ndodhi për motive të dobëta.

“Specialistët për Hetimin e Krimit në Komisariatin e Policisë Mat, në vijim të punës për kapjen e personave në kërkim dhe vënien e tyre para përgjegjësisë ligjore, kanë kapur dhe ndaluar shtetasin në kërkim S. N., 26 vjeç, banues në Burrel.

Kapja dhe ndalimi i tij u bë pasi në datë 01 shtator 2020, në qytetin e Burrelit, pas një konflikti për motive të dobëta dyshohet se ka qëlluar me armë zjarri në ajër dhe kanosur një 26 vjeçar.

Për shtetasin e lartëpërmendur Gjykata e Rrethit Gjyqësor Mat ka vendosur masën e sigurimit personal “Arrest me burg”, i dyshuar për kryerjen e veprave penale “Mbajtja pa leje dhe prodhim i armëve, armëve shpërthyese e municioneve”, “Kanosje” dhe “ Prishje e qetësisë publike”, thuhet në njoftimin e Policisë.