Vetëvrasja tek ‘Shefqet Ndroqi’, Marsela Lekli: Dështim i spitalit, ka një numër të vogël psikologësh

Sot është shënuar një tjetër viktimë në spitalin “Shefqet Ndroqi”, ku një pacient 60-vjeçar u hodh nga lartësia. Për këtë ngjarje të rëndë psikologia Marsela Lekli u shpreh për Euronews Albania se në spitalet COVID ka një numër të vogël psikologësh.

Sipas saj këshillimet për pacientët nuk janë kryer ashtu siç duhet dhe se vetëvrasjet janë një dështim i spitalit.  

“Nuk kemi një numër fiks se sa psikologë janë në gatishmëri për të trajtuar pacientët me COVID. Duke pasur parasysh situatat e fundit që shumë persona janë vetëflijuar, kjo do të thotë që numri i psikologëve është i dobët dhe këshillimi nuk mund të jetë i kryer ashtu siç duhet. Duke parë nga vetëflijimi i parë dhe deri në momentin që ne flasim rastet po shtohen.

Ky është një dështim i spitalit. Nuk është puna tek ne që nuk mund të bëjnë ne punë tonë si psikologë, por është kompetencë e spitaleve që të marrin këto nisma për të bërë trajtimin e duhur në spitale”, u shpreh znj. Lekli.

Ajo sqaroi më tej se pacientët e infektuar mund të kenë edhe probleme mendore, apo mund të kenë kaluar trauma, të cilët duhet të trajtohen menjëherë sapo mbërrijnë në spitalet COVID.

“Pacientët mund të ketë shqetësime të tjera mendore, mund të kenë çrregullime mendore, mund të jenë ndjekur nga një psikiatër. Mund të jenë persona që të kaluarën kanë pasur trauma. Këta persona që infektohen me COVID duan trajtim më të mirë të psikologut dhe psikiatrit.

Një person që nuk ka pasur probleme të tilla nuk e mendoj se mund të marrë të tillë akt. Është edhe çështje karakteri e personit sesi mund ta përjetojë infektimin. Nuk e dimë se çfarë i ka shtyrë këta persona, nuk e kemi informacion nga kartela e tyre”, tha ajo më tej.  

Lexoni gjithashtu:

Vetëvrasja e pacientit tek ‘Shefqet Ndroqi’, reagon spitali: Po kryhet hetimi, kemi shtuar masat e sigurisë