Prishtina merr vendim, qytetarët do udhëtojnë falas me transportin publik për 30 ditë

Kryetari i Komunës së Prishtinës, Shpend Ahmeti, ka bërë të ditur se qarkullimi me autobusët urbanë do të jetë falas për të gjithë qytetarët për një muaj rresht.

Ky vendim i ri shtoi Ahmeti do të aplikohet duke nisur nga nesër, datë 1 dhjetor, dhe kjo do t’iu vijë sadopak në ndihmë atyre familjeve, të cilat përdorin këtë shërbim në përditshmërinë e tyre.

“Qarkullimi me autobusët e trafikut urban do të jetë falas për të gjithë qytetarët për një muaj rresht, duke filluar nga nesër 1 dhjetor. Zbatimi i të gjitha rregullave dhe masave mbrojtëse kundër Covid19 mbeten në fuqi dhe janë të obligueshme për secilin që udhëton me këta autobusë”, shkruan ai në “Facebook”. 

Kreu i Prishtinës ka kërkuar nga qytetarët të tregohen të kujdesshëm për ruajtjen e shëndetit në kohë pandemie.

“Të vazhdojmë të jemi të kujdesshëm dhe të ndërgjegjshëm për mbrojtjen e shëndetit tonë dhe të tjerëve rreth nesh”, shton ai.