Skënder Gega drejt shërimit nga COVID-19, kthehet në Tiranë pas mjekimit në Turqi

Trajneri i klubit të Kukësit, Skënder Gega, ka mundur të riaftësohet nga gjendja e rëndë që i shkaktoi infektimi me COVID-19.

Pesëdhjeteshtatëvjeçari ka lënë spitalin turk ku ishte shtruar prej disa ditësh dhe është rikthyer në Tiranë.

Lajmi u njoftua nga klubi i Kukësit, i cili saktësoi se “falë progresit pozitiv nga terapia e ndjekur, Gega është lejuar të kthehet në Tiranë”.

“Gjendja e tij është shumë e mirë dhe shpejt ai do t’i bashkohet ekipit,” – u shprej klubi i Kukësit.

Prej rreth një jave Gega u trajtua në një klinikë private në Stamboll. Sipas klubit të Kukësit ai u ndoq nga mjeku shqiptar Gersi Alisha.

Trajneri i njohur u diagnostikua me COVID-19 më 12 nëntor, katër muaj pasi u rikthye si trajner në Superligë.

Gega, i cili në të shkuarën ka drejtuar edhe ekipet zinxhire të përfaqësueses shqiptare të futbollit, korri sukses me Partizanin ku në sezonin 2018-2019 arriti ta rishpallte kampione pas 26 vitesh.

Lexoni gjithashtu:

Shëndeti i trajnerit të Kukësit Skënder Gega drejt përmirësimit

Trajneri i kombëtares së vajzave Armir Grima me COVID-19, anulohet konferenca për shtyp