Dita Ndërkombëtare e Vullnetarizmit, Avdullah Hoti vlerëson angazhimin e qytetarëve

Kryeministri i Kosovës, Avdullah Hoti, duke uruar Ditën Ndërkombëtare të Vullnetarizmit, ka shkruar se njerëzit kryesisht të rinjtë e të rejat, në të gjitha etapat e rrethanat janë dëshmuar me angazhimin dhe shpirtin e tyre vullnetar.

Shefi i ekzekutivit shkroi në “Facebook” se kjo ditë e shënuar u dedikohet të gjithë atyre vullnetarëve, të cilët sakrifikojnë interesat e tyre personale për interesat e shoqërisë dhe komunitetit.

“Kjo ditë e shënuar u dedikohet të gjithë atyre vullnetarëve që sakrifikojnë interesat e tyre personale për interesat e shoqërisë dhe komunitetit dhe në të njëjtën kohë përfitojnë edhe shkathtësi, eksperienca dhe miqësi të reja anekënd botës”, shkroi ai.

Ai veçoi rolin dhe angazhimin e të rinjve për kontributin dhe rolin e luajtur në shoqërinë e Kosovës.

“Njerëzit e vendit tonë, kryesisht të rinjtë e të rejat, në të gjitha etapat e rrethanat janë dëshmuar me angazhimin dhe shpirtin e tyre vullnetar. Shpresoj se vitin tjetër këtë ditë të veçantë do ta shënojmë në kushte krejt normale dhe pa pandemi”, shton ai.