Pasqyra e dezinformimit në Shqipëri, PE: Dezinformimi i kudondodhur, pak prova të ndikimit nga jashtë

Media në Shqipëri, ashtu si në të gjithë rajonin ka rënë pre e dezinformimit dhe lajmeve të rreme. Raporti i kërkuar nga Parlamenti Europian tregon se ndryshe nga tregu në rajon ku media lufton për mbijetesë duke u ushqyer nga tregu, në Shqipëri, ato kanë gjetur një burim alternativ të ardhurash, duke përshirë përdorimin për përfitim të pronarëve apo klientëve.

Shumica dërrmuese e dezinformimit prodhohet nga vetë media vendase, pa ndikimin e faktorëve të jashtëm. Kjo bëhet për të rritur trafikun në faqet e tyre online që të rrisin të ardhurat, nëpërmjet raportimeve emocionale me kontroll të pakët të vërtetësisë së tyre. Lloji tjetër i dezinformimit, është ai që bëhet për qëllime politike.

Shumë politikanë kanë përfituar nga kjo, ashtu si edhe vetë kryeministri Edi Rama, në rastin e videos së publikuar që tregonte policinë që ushtronte dhunë kundër njerëzve që kishin thyer karantinën, ku thuhej se ngjarja ishte e vendosur në Spanjë, por në fakt ishte në Algjeri. Si rast tjetër i dezinformimit në këtë raport evidentohen artikujt për importimin e 1300 ton mbetjesh toksike nga Italia në vitin 2018.

Raporti përmend me emër 1 televizion të madh kombëtar dhe një televizion lokal por edhe uebsite që kanë një reputacion si cilësorë, por që kanë rënë pre e dezinformimit. Ndikimi nga faktorë të jashtëm, është megjithatë shumë i dobët. Ka disa evidenca për ndikimin rus për të minuar integrimin në strukturat Euro-Atlantike. Pavarësisht kësaj, Bashkimi Europian, Këshilli i Europës dhe qeveria shqiptare i kanë identifikuar të gjitha këto dezinformime si kërcënim për sigurinë kombëtare të Shqipërisë.

Rekomandimi i këtij studimi për Shqipërinë është që të rritet pavarësia e medias nga shteti, duke përfshirë qeverinë si dhe të rritet transparenca e pronësisë së medias. Shtuar kësaj, zbatimi i ligjit të ri të medias duhet të monitorohet ngushtësisht, po ashtu t’i bëhet presion qeverisë t’i përmbahet nga tjetërsimi i ligjit, veçanërisht nëse identifikohen abuzime serioze.