Shpallet fituesi i tenderit, së shpejti nis planifikimi i rikualifikimit urban të pjesës veriore të Unazës së Madhe

Dy vite pas rikualifikimit urban të zonës perëndimore të Unazës së Madhe në Tiranë, shpallja e fituesit të tenderit për projektimin e pjesës veriore i hap rrugë rikualifikimit urban që lidh segmentet nga ish-Sheshi Shqiponja te zgjatimi i “Bulevardit Zogu i Parë”.

Rruga prej rreth 3 kilometrash do të projektohet nga bashkimi i kompanive “Seed Consulting” dhe “Atelier 4”, të cilët u shpallën fitues të tenderit të hapur në muajin gusht nga Autoriteti Rrugor Shqiptar.

Tenderi, në të cilin morën pjesë tetë kompani, nuk pati ankesa, ndërsa oferta e dy kompanive që e fituan atë është me vlerë rreth 245 mijë euro (31 milionë lekë). Tashmë ata do të planifikojnë rrugën, punë e cila sipas kontratës do të kërkojë rreth 21 muaj kohë.

Unaza e Madhe, një projekt i ideuar që në fund të viteve 80-të, është ndryshuar disa herë për shkak, kryesisht, të problemeve me shpronësimet, financimet dhe dinamikës së zhvillimit të kryeqytetit.

Aktualisht është plotësuar vetëm pjesa jug-perëndimore. Ana jug-lindore është në ndërtim, ndërsa pjesa perëndimore nisi të rikonceptohej në vitin 2018, sipas një projekti të ri që parashikon zgjerimin e rrugës dhe ndërtimin e disa nënkalimeve dhe mbikalimeve hyrëse-dalëse.

Plotësimi i Unazës së Madhe të Tiranës, i parashikuar edhe në planin e përgjithshëm “Tirana2030” të hartuar në bashkëpunim me arkitektin italian Stefano Boeri, parashikohet të reduktojë ndjeshëm trafikun duke i mundësuar rrugë alternative për qarkullimin në hyrje dhe dalje të kryeqytetit.

Lexoni gjithashtu:

Ministrja Balluku kërkon përfundimin sa më parë të pjesës lindore të Unazës së Madhe të Tiranës

IKMT rinis prishjet ndërtesave në Shkozë për vazhdimin e projektit të unazës