Numri i viktimave nga COVID,  Rakacolli: Aktualisht nuk mund të bëhen bilance të tilla

Situata e COVID-19 në vendin tonë aktualisht sipas komitetit teknik të ekspertëve është e qëndrueshme, por në javën e ardhshme do vendoset nëse do të merren apo jo masa të reja kufizuese.

“Gjendja mbetet relativisht e qëndrueshme dhe do na duhet një javë tjetër për të parë a do të vazhdojë kjo qëndrueshmëri dhe në bazë të vlerave që do të kemi këtë javë do të gjykohet nëse do të ngelemi në nivelin e këtyre masave apo do të ketë nevojë për masa të tjera. Është një javë e rëndësishme në vlerësimin epidemiologjik të situatës”, – tha znj. Rakacolli.

Sa i përket lajmit të publikuar në Euronews Albania se raportimet e vdekjeve prej COVID nga Ministria e Shëndetësisë ndryshojnë nga ato të bashkive, Euronews Albania pyeti Komitetin Teknik se përse po ndodh diçka e tillë?

Zv.ministrja e Shëndetësisë, Mira Rakacolli tha se aktualisht nuk mund të ketë bilance të sakta.

“Raportohen të gjitha ato raste të cilat strukturat tona shëndetësore i kualifikojnë si raste vdekje nga COVID dhe këtu nuk ka absolutisht as edhe një lloj fshehje. Jemi në mes të një lufte dhe zakonisht bilancet nuk bëhen në mes por në fund”, tha znj. Rakacolli.

Në raportimet e vdekjeve nga COVID mësohet gjithashtu se nuk përfshihen qytetarët të cilët shkojnë për t’u kuruar nga virusi jashtë vendit. Nga ana tjetër, çdo njeri që humb jetën jashtë kufijve të Shqipërisë dhe është me kombësi shqiptare, teorikisht duhet të çregjistrohet nga regjistri i gjendjes civile.