Dyshohet se u vranë me armë, gjenden të vdekur dy vëllezër në Maliq

Vëllezërit Andrea dhe Martin Olldashi, të moshës 31 dhe 33 vjeç, u gjetën mesditën e sotme të vdekur në një fshat rreth 10 kilometra në veri të Maliqit në qarkun e Korçës.

Të afërmit e tyre i kishin deklaruar të zhdukur, pasi prej tre ditësh nuk ishin kthyer në shtëpinë e tyre në Pogradec.

Policia tha se ata dyshohet të jenë vrarë me armë në fshatin Zvirinë të Maliqit. Autoritetet po hetojnë për të zbardhur itinerarin e lëvizjeve të dy vëllezërve dhe autorët e mundshëm të vrasjes.

Momentalisht kufomat e dy të vëllezërve ndodhen në morgun e Korçës ku pritet t’u bëhet analiza mjeko-ligjore për të kuptuar më mirë shkakun dhe kohën e vdekjes.

Burime për Euronews Albania bënë me dije se viktimat ishin me precedentë penale, kryesisht për grabitje banesash ndërsa, Andrea Olldashi, i njohur edhe me emrin Andi, qe arrestuar në vitin 2012 për vendosjen e një sasie eksplozivi në një lokal të zonës.

Më poshtë pamjet ekskluzive nga Euronews Albania të vendit ku u gjetën viktimat.