Komisioni i Jashtëm i PE-së diskuton draft-raportin për Shqipërinë: Realizoni reformat kyçe

Shqipëria duhet t’i rikthehet normalitetit politik. Ka qenë ky rekomandimi kryesor i raportueses për Shqipërinë në Parlamentin Evropian, Isabel Santos, e cila nuk ka lënë mënjanë as thirrjet për përmbushjen e reformës në drejtësi dhe luftën kundër korrupsionit dhe krimit, procese ku sipas saj duhet të përfshihet edhe shoqëria civile.

“Jam e shqetësuar në lidhje me pjesëmarrjen e shoqërisë civile në këtë proces, duhet më shumë transparencë në lidhje me luftën kundër korrupsionit dhe krimit. Gjithashtu, reforma në gjyqësor duhet përfunduar. Të gjitha forcat politike janë të vetëdijshme për zhvillimet e fundit elektorale dhe nevojën për rikthimin e normalitetit politik në vend”, është shprehur znj. Santos.

Në seancën e Komisionit për Politikat e Jashtme në PE, ku u diskutua draft-raporti për Shqipërinë në lidhje me çeljen e negociatave të anëtarësimit, Santos vlerësoi megjithatë marrëveshjen e 15 qershorit mes partive politike, e cila sipas saj duhet të merret parasysh nga Brukseli.

“Forcat politike në Shqipëri kanë arritur një marrëveshje më 15 qershor dhe ne duhet ta njohim atë, pavarësisht qëndrimeve të ndryshme që kemi. Kjo marrëveshje duhet të njihet në përfitim të qytetarëve dhe shtetit shqiptar, edhe pse ata janë mbrapa në procesin e anëtarësimit”, ka deklaruar raportuesja për Shqipërinë në PE.

Një tjetër shqetësim i shprehur prej saj ishte largimi i të rinjve nga Shqipëria. Raportuesja për vendin tonë i ka bërë thirrje BE-së për më shumë vëmendje në këtë aspekt, në mënyrë që të krijohen kushtet që rinia shqiptare të qëndrojë në vendin e saj.