Shoqatat e gazetarëve të indinjuara nga dhuna dhe arrestimi i gazetarit Xhoi Malësia

Dy shoqata të gazetarëve i bënë sot thirrje autoriteteve të vënë përpara përgjegjësisë punonjësit e policisë të cilët penguan dhe dhunuan gjatë detyrës gazetarin e Ora News, Xhoi Malësia.

Përmes një postimi në Facebook “Shoqata e gazetarëve profesionistë të Shqipërisë” dhe “Lidhja e gazetarëve të Shqipërisë”, shprehën indinjatën për dhunën e policisë drejt gazetarit Malësia teksa ky ishte duke raportuar për protestën e së enjtes, mbajtur për vrasjen e 25-vjeçarit Klodian Rrasha.

Malësia thuhet se u pengua, dhunua dhe shoqërua në polici pa të drejtë teksa ishte në detyrë.

“Kjo dhunë policore ndaj një gazetari në krye të detyrës […] është një sjellje e papranueshme dhe jo e re ndaj gazetarëve,” – thuhet në deklaratën e dy shoqatave teksa më tej theksojnë se autoritetet duhet të reflektojnë nga këto ngjarje.

Më tej shoqatat kërkojnë nga drejtuesit e policisë vënien përpara përgjegjësisë së oficerëve të policisë të cilët dhunuan gazetarin.

Vitet e fundit Shqipëria është kritikuar ndjeshëm për sa i përket lirisë së medias dhe marrëdhënieve të autoriteteve në raport me gazetarët.

Reporterët pa Kufij e kanë zbritur Shqipërinë në vendin e 84-të nga ranglista botërore e indeksit të kërcënimit të gazetarëve, kryesisht prej qasjes agresive të zyrtarëve ndaj medias dhe përpjekjes së qeverisë për të ndryshuar ligjin e medias.