“Xhama të thyer dhe dyer të djegura”, Policia e Shkodrës bën bilancin e bastisjes së selisë së Partisë Socialiste

Policia e Shkodrës ka bërë bilancin paraprak të dëmeve nga tensionet e sotme, ku një grup të rinjsh sulmuan dhe dogjën selinë e Partisë Socialiste. Policia e kryeqendrës së veriut thotë se nga përplasja ka mbetur i plagosur edhe një efektiv policie, i cili është dërguar në spitalin rajonal për trajtim mjekësor.

“Gjithashtu gjatë tubimit është gjuajtur me sende të forta në drejtim të Policisë dhe për pasojë është plagosur një nga punonjësit e Policisë të Forcës së Posaçme Shqiponja i cili u dërgua menjëherë në Spitalin Rajonal Shkodër për mjekim”, thuhet në njoftim.

Sipas Policisë, protestuesit kanë thyer dyer e dritare të Partisë Socialiste si dhe kanë djegur bazën materiale në brendësi të godinës.

“Pjesëmarrësit në tubim kanë dëmtuar me sende të forta godinën e një subjekti politik duke thyer e shkatërruar dritaret dhe dyert e më pas nxorën dhe dogjën bazën materiale që ishte në brendësi të godinës”, thekson Policia e Shkodrës.

Kryeministri i vendit ka fajësuar opozitën për nxitje të dhunës, kurse Partia Demokratike parmes Gazment Bardhit tha se keqqeverisja e Edi Ramës në shtatë vite ka çuar në revoltën qytetare.

Gazetari i Euronews Albania, Teodor Gjerga, thotë se aktualisht situata paraqitet e qetë, ndërsa Policia e Shkodrës ka nisur punën për të sekuestruar pamjet e kamerave të sigurisë për të identifikuar të rinjtë, të cilët sulmuan, thyen dhe më pas dogjën dokumente dhe orenditë e brendshëm të Partisë Socialiste.

Lexoni gjithashtu: 

Tensionet në vend, ambasadorja Yuri Kim përsërit thirrjet për vetëpërmbajtje

Tensionet në vend, PD: Dhuna dhe arroganca 7-vjeçare e Edi Ramës janë shkaktarët e revoltës

Sulmi i selisë së PS në Shkodër, reagon Rama: Terroristët e Boko Haramit i përdorin fëmijët si kamikazë

Tensionohet situata në Shkodër, sulmohet selia e PS-së, ndërhyn FNSH