Milan vuan dëmtimet, kuqezinjtë pa katër lojtarë kryesorë në ndeshjen përballë Genoas

Pas barazimit në ndeshjen përballë Parmës që erdhi në minutat e fundit, Milani do të kërkojë të rikthehet te fitorja në ndeshjen përballë Genoas.  

Kundërshtari që kanë përballë nuk konsiderohet si i vështirë në letër por kuqezinjtë po hasin shumë problem me dëmtimet.

Trajneri Pioli nuk do ketë në dispozicion dy mbrojtësit e qendrës Kjaer dhe Gabbia, të dy të dëmtuar.

Problem ka edhe në repartin e mesit të fushës ku do mungojë Benacer dhe pritet që në vend të tij të aktivizohet i riu, Tonali.  

Një mungese e madhe do jetë edhe lideri i skuadrës Zllatan Ibrahimovic, i cili akoma nuk e ka lënë pas dëmtimin e pësuar në ndeshjen përballë Napolit.

Megjithatë kuqezinjtë nuk kërkojnë që të gjejnë justifikime.

Për momentin ndodhen në krye të klasifikimit dhe përballë skuadrës që ndodhet në vendin e parafundit të renditjes kërkojnë tre pikët për të qëndruar në krye për një tjetër javë.  

Objektivi i vërtetë i tyre vazhdon të mbetet zona Champions por tashmë në Milanelo fjala titull ka nisur të qarkullojë nën zë, u takon vetëm atyre që të vërtetojnë në fushën e lojës nëse kjo ëndërr mund të bëhet realitet.