Plotësimi i Kushtetueses, “Ligjet” miratojnë kandidaturën e Altin Binajt

Komisioni i Ligjeve miratoi kandidaturën e Altin Binaj për anëtar në Gjykatën Kushtetuese.

Vendimi erdhi pasi Binaj doli në seancë dëgjimore para anëtarëve të Komisionit, ku bëri një prezantim të eksperiencës së tij profesionale, arsyet që e shtynë për të kandiduar, por edhe objektivat që ai synon të arrijë nëse do të votohet për të marrë pozicionin e anëtarit të Kushtetueses.

Pasi kaloi sot në Komisionin e Ligjeve, kandidatura e Binajt do të votohet në Kuvend ditën e enjte që do të jetë dhe seanca e fundit parlamentare për këtë vit.

Bashkimi Evropian dhe ambasadorët e huaj në Tiranë vazhdimisht kanë bërë thirrje që Gjykata Kushtetuese të bëhet funksionale para fundit të këtij viti pasi mbetet një prej kushteve kryesore për integrimin e Shqipërisë në Bashkimin Evropian.

Aktualisht në Gjykatën Kushtetuese janë anëtare vetëm katër zonjat, Vitore Tusha, Elsa Toska, Marsida Xhaferllari dhe Fiona Papajorgji, ndërkohë që pesë vendet e tjera mbeten vakante. Gjykatës Kushtetuese i duhen edhe dy emërime të reja për t’u bërë funksionale.