Vuçiç takon liderët serbë të Kosovës, Nexhmedin Spahiu: Gabim trashanik i qeverisë dhe aleatëve amerikanë

Drejtues të Listës Serbe së Kosovës, takuan dje në Beograd presidentin e Serbisë, Aleksandër Vuçiç.

Presidenca serbe deklaroi se Vuçiç dhe përfaqësuesit politikë e institucionalë të serbëve në Kosovë, kanë arritur disa konkluzione, që për qëllim kanë, ruajtjen e interesave të serbëve në Kosovë.

Për këtë takim, politologu Nexhmedin Spahiu u shpreh në Euronews Albania se po tentohet që të rritet influenca serbe në Kosovë.

Ai theksoi se takimi i djeshëm është një gabim trashanik i qeverisë së Kosovës dhe aleatëve, në radhë të parë amerikanëve.

“Është e qartë, Rusia ndikimin e vet në Ballkan dhe Kosovë tenton ta arrijë përmes shtetit serb. Në Kosovë nuk ka ndonjë aktivitet tjetër të veçantë përveç sa i përket shtrirjes së influencës. Kryesisht ajo është prezente me zyrën e saj e cila këtu në Kosovë këtu ka më tepër një aktivitet konstruktiv, nuk bën diçka që bie ndesh me interesat e Kosovës, por mbahet peng çështja e statusit të Kosovës dhe tentohet që influenca serbe në Kosovë të jetë sa më e madhe dhe duke i ndihmuar atë në arenën ndërkombëtare. Sa i përket takimit të Listës Serbe ka qenë një gabim trashanik i qeverisë së Kosovës dhe aleatëve, në radhë të parë amerikanëve, të cilët në një moment të caktuar kur kishim një forcë politike serbe në Kosovë dhe ishte e pavarur nga Beogradi, ishte e përfaqësuar në parlamentit e Kosovës, ajo filloi të krijojë një legjitimet të mirë, iu kthyen dhe ndihmuan Vuçiç-in që ta shkatërrojë këtë forcë politike dhe ta dominojë skenën politike në mesin e serbëve të Kosovës përmes krimit të Listës Serbe. Kjo u bë përmes një serie vrasjesh politike. ”, tha ai.

Për pyetjen se a do të  ketë destablizim në Kosovë me zhvillimet e fundit, z.Spahiu theksoi se nuk beson se kjo gjë do të ndodhë, pasi fuqia numerike e Listës Serbe në Kosovë është e vogël.

“Nuk mendoj se do të ketë. Mendoj që fuqia numerike e listës serbe është e vogël, është forca e pestë politike në Kosovë. Minoriteti serb në Kosovë është i vogël në numër. Por, në kuptimin e organizmit është më shumë cilësor, sesa vetë komuniteti shqiptar që përbën shumën absolute të popullatës”, u shpreh ai më tej.

Sa i përket çështjes së zgjedhjes së presidentit, politologu tha se ai duhet të zgjidhet me votë nga populli.

“Zgjedhja e presidentit të Kosovës bëhet nga parlamenti. Ndërkohe në vendet e Ballkanit zgjedhja e presidentit bëhet me votë direkte. Kjo është zgjidhja më e mire. Zgjedhja e presidentit me votë direkte, vota direkte gjithmonë prodhon një president. Gjithmonë një nga kandidatët do të fitojë një votë më shumë. Nuk ka nevojë për pazare”, u shpreh ai.

Lexoni gjithashtu:

Aleksandar Vuçiç takon liderët serbë të Kosovës, brenda 72 orësh publikohen konkluzionet