Barnat për pacientët me COVID, nga 1500 farmaci vetëm 927 ofrojnë rimbursim

Pacientët me COVID-19 të cilët po kurohen në kushte shtëpie, prej një muaji kanë mundësi t’i përfitojnë barnat me rimbursim.

Hapi i parë që pacientët duhet të kryejnë pasi mësojmë se janë pozitiv me COVID është kontakti me mjekun e familjes për të përfituar kodin e recetës me rimbursim.

Pasi merret nga mjeku i familjes kodi i recetës me rimbursim, i afërmi i një pacienti me COVID duhet të drejtohet pranë një farmacie për të siguruar këto barna.

Farmacisti Dorian Hoxhallari tha për Euronews Albania se rimbursimi i barnave ka nisur por shpesh pacientët për shkak se nuk mund të presin përgjigjen e tamponit, i duhet t’i marrin ilaçet pa rimbursim.

“Pacientët tentojnë që t’i marrin vetë barnat, por që ka edhe nga ata pacientë që përfitojnë nga rimbursimi. Ndoshta u vonohet përgjigja e tamponit, pacientët duke folur edhe me mjekun tentojnë t’i marrin vetë barnat ndoshta edhe jashtë skemës së rimbursimit,” – tregoi Hoxhallari.

Sipas Fondit të sigurimit të detyrueshëm të kujdesit shëndetësor aktualisht mundësinë e rimbursimit të barnave e kanë 927 farmaci nga 1500 farmaci që ka në total në të gjithë Shqipërinë.

Nga ana tjetër mjekja e familjes Xhentiliana Nasa bëri thirrje që qytetarët të flasin menjëherë me mjekun që me simptomat e para, në mënyrë që të bëhen sa më shpejt pjesë e skemës së rimbursimit.

“Që me simptomat e para duhet të lidhen me mjekun e familjes, për t’u përfituar kështu diagnostikimi i shpejtë, pra referimin për tampon dhe kryerjen e sa më të shpejtë të tij si dhe për t’u bërë edhe pjesë e paketave të ilaçeve me rimbursim. Gjatë orëve të përgjigjes së tamponit, pacientit i rekomandohet duke qenë se është në stadin e fillimit të simptomave, anti imflamator si paracetamol dhe dieta me lëngje,” – u shpreh mjekja.

Paketa e mjekimit bazë për pacientët me COVID sipas mjekes, përmban vitaminoterapi, antipiretikë, antibiotikë, antikoagulantë dhe kortizonikë.