Gjykata Kushtetuese, KED i dërgon nesër Presidentit listën e kandidatëve

Këshilli i Emërimeve në Drejtësi do të mblidhet nesër për të përcaktua emrat e kandidatëve për Gjykatën Kushtetuese që do t’i dërgojë Presidentit të Republikës për miratim.

Në garë për plotësimin e vakancës së mbetur janë Aleksandër Toma dhe Përparim Kalo pasi disa të tjerë janë s’kualifikuar nga gara për shkak se nuk plotësojnë kushtet ligjore.

KED do të bëjë renditjen e këtyre dy kandidatëve në bazë të pikëve dhe më pas do të jetë kreu i shtetit që do të përzgjedhë për t’i dhënë mandatin e gjyqtarit.

Të enjten e kaluar, Parlamenti votoi me 96 vota pro Altin Binajn si anëtar të Gjykatës Kushtetuese duke u bërë kështu anëtari i pestë i kësaj gjykate. Bashkë me emërimin që pritet të bëjë presidenti, Gjykata Kushtetuese do të rikthehet në funksion pas një periudhe të gjatë pezullimi.

Shkak për daljen e saj jashtë funksioni u bë dorëheqja e disa prej anëtarëve në prag të nisjes së procesit të vetingut ndërsa disa të tjerë u shkarkuan me vendim të komisioneve verifikuese të vetingut.

Vënia në funksion e Gjykatës Kushtetuese është një prej kushteve të Bashkimit Evropian për hapjen e negociatave në anëtarësimin e Shqipërisë në Bashkimin Evropian.