Bie ndjeshëm numri i infektimeve me COVID-19 në Kosovë

Kosova ka shënuar një rënie të ndjeshme të numrit të rasteve të reja, ku gjatë 24 orëve të fundit nga kryerja e 841 testeve vetëm 137 raste kanë rezultuar pozitive.

Ndërkohë shqetësim mbetet numri i rasteve fatale, ku gjatë ditës së fundit ka pasur 10 të vdekur të moshës nga 49 deri në 81 vjeç.

Që prej fillimit të pandemisë, Kosova numëron 1 272 të vdekur ndërsa  raste pozitive deri tani janë gati 50 mijë.

Sot Kosova ka më pak se 11 mijë raste aktive kurse gjatë 24 orëve të fundit, janë shëruar 382 pacientë derisa numri i përgjithshëm i të shëruarve deri më sot është gjithsej 37.155 raste.

Rastet pozitive janë nga komunat: Prishtinë 59 raste, Gjakovë 19 raste, Gjilan 7 raste, Suharekë 7 raste, Vushtrri 6 raste, Malishevë 5 raste, Pejë 5 raste, Prizren 5 raste, Fushë-Kosovë 4 raste, Obiliq 4 raste, Viti 3 raste, Deçan 2 raste, Istog 2 raste, Klinë 2 raste dhe me nga 1 rast komunat Drenas, Ferizaj, Kamenicë, Lipjan, Mitrovicë, Podujevë dhe Rahovec.