Berlini dërgon ushtarë në Lituani

Berlini është gati të stacionojë një brigadë ushtrie prej 4 mijë trupash në Lituani, në mënyrë të përhershme, në koordinim me planifikimin e mbrojtjes së NATO-s pas pushtimit rus të Ukrainës.

Lajmi u bë me dije nga ministri gjerman i mbrojtjes.

“Gjermania qëndron në angazhimin e saj si një anëtare e NATO-s, si ekonomia më e madhe e Evropës, për të mbrojtur krahun lindor”, tha ministri gjatë një vizite në Vilnius.

Në të kaluarën, Berlini tha se Lituanisë do t’i duheshin vite për të siguruar kazerma, zona banimi për familjet, depo dhe terrene trajnimi.

‘Stacionimi duhet të jetë gjithashtu në përputhje me planet rajonale të NATO-s, duke detajuar se si do t’i përgjigjej një sulmi rus’, theksoi ministri.

Gjermania tashmë drejton batalionin luftarak shumëkombësh të NATO-s në Lituani, prej rreth 1000 trupash. Përtej kësaj, një brigadë gjermane është në gatishmëri në Gjermani për të përforcuar me shpejtësi praninë në Lituani nëse do të ishte e nevojshme.

Shefi I NATOs Stoltenberg e mirëpriti njoftimin e Gjermanisë, por hodhi poshtë thirrjet për shtimin e menjëhershëm të trupave përgjatë krahut lindor të aleancës, në përgjigje ndaj rebelimit në Rusi.

Udhëheqësit e NATO-s do të takohen në Vilnius më 11-12 korrik për të diskutuar edhe zhvillimet e fundit.

LEXONI GJITHASHTU: 

• “Dielli shkakton mish të huaj në sy”-mjekja Bardhi sqaron si ta shmangim
• Republika Sërpska kërcënon Kosovën e Bosnjen