Burokraci mes Kosovës e Shqipërisë, Minxhozi: Bashkimi kombëtar vjen prej bashkimit ekonomik

Kosova vazhdon t’i kërkojë Shqipërisë lehtësime doganore për shkëmbimet tregtare. Presidenti Thaçi ka thënë se është i gatshëm të heqë kufijtë dhe barrierat.

“Ne nuk kemi nevojë fare për kufij mes Kosovës dhe Shqipërisë. Ne nuk kemi nevojë për asnjë barrierë. Unë edhe njëherë e ftoj kryeministrin, mikun tim Edi Ramën,që të caktojë ditën dhe datën e heqjes së kufirit të çdo barriere kufitare mes shtetit të Kosovës dhe Shqipërisë”- theskoi Hashim Thaçi, President i Kosovës.

Por janë edhe disa barriera që bizneset shqiptare kanë në kosovë për shkak të problematikave ligjore.

 “Është shumë e vështirë për të marrë një leje qëndrimi në Kosovë, për një shtetas të Shqipërisë, për një biznes të Shqipërisë. Është shumë e vështirë”-pohoi ambasadori i Shqipërisë në Kosovë,Qemal Minxhozi.

Pavarësisht barrierave, ambasadori Minxhozi tha se shkëmbimet tregtare midis shqipërisë dhe kosovës janë rritur me 15 përqind. Por ka potencial për më tepër.

“Ne duhet të forcojmë tregun midis Shqipërisë dhe Kosovës. Ne duhet të krijojmë të gjithë hapësirën, që të mos ketë barriera për zhvillimin e shkëmbimeve midis nesh. Bashkimi kombëtar numër një është duke pasur një bashkim tregjesh”- u shpreh Minxhozi.

Deri më tani është arritur liberalizimi i shkembimit të energjisë dhe Porti i Durrësit përdoret edhe nga shteti kosovar.

Por, problematikat kryesore vijojnë të jenë taksa rrugore, certifikatat sanitare dhe tarifat e skanimit, që shtojnë kosto për bizneset e Kosovës që operojnë në Shqipëri.

Ambasadori Minxhozi tha se duhet një punë në aspektin administrativ për të eleminuar burokracitë e dyanshme.