Festimet e fundvitit, Policia e Shtetit apelon për respektim të masave anti-COVID

Në kuadër të festave të fundvitit me qëllim krijimin e një mjedisi të sigurt dhe të qetë për qytetarët dhe në zbatim të masave të dhëna nga Ministria e Shëndetësisë me qëllim parandalimin e përhapjes së COVID-19 strukturat e Policisë së Shtetit kanë marrë një sërë masash shtesë.

Drejtori i Sigurisë në Policinë e Gjovalin Loka bëri me dije këto masa të cilat duke filluar nga dita e sotme dhe deri në 4 janar të vitit 2021 do të jenë të lidhura kryesisht me orarin e lëvizjes për këmbësorët, automjetet dhe bizneset do të ndalohet nga ora 20:30 deri ne 06:00.

“Përjashtohet nga ky kufizim vetëm personeli shëndetësor, ai policor e ushtarak, gazetarët dhe ata që janë turn i parë në linjat e prodhimit dhe konsumit të përditshëm,” – tha Loka.

Ai solli në vëmendje se përveç forcave të shtuara policore dhe gatishmërisë një kontroll i detajuar do t’i kushtohet tregtarëve dhe prodhuesve të lëndëve piroteknike dhe fishekzjarrëve.

Policia e Shtetit synon që festat të kalojnë të paqta dhe të ketë siguri qytetare duke shmangur në këtë mënyrë skenat e mundshme të paligjshmërisë.

Së fundmi, Loka apeloi që të ndihmohet Policia e Shtetit duke bërë thirrje që të shmanget plasja e fishekzjarrëve dhe të gjithë të festojnë pranë familjeve.

Policia e Shtetit uroi qytetarët dhe solli në vëmendje se këto nuk do të jenë festa njësoj si të viteve të kaluara e se grumbullimet duhen shmangur.