KQZ pranon propozimin e opozitës, 4 muaj para zgjedhjeve ndalohen koncesionet

Duke filluar nga data 25 dhjetor deri në 25 prill nuk do të lejohet që të jepen kontrata koncesionare që nuk kanë qenë më herët të paralajmëruara. Ky propozim erdhi nga opozita në mbledhjen e Komisionit Rregullator të KQZ dhe u mbështet nga përfaqësuesi i maxhorancës. Propozimi i ardhur nga përfaqësuesi i opozitës në Komisionin Rregullator, Muharrem Çakaj u pranua edhe nga përfaqësuesi i Partisë Socialiste, Eridian Saliani.

“Të shtohet pika 4 me këtë përmbajtje, “Katër muaj para datës së zgjedhjeve deri në ditën e zgjedhjeve ndalohet dhënia e kontratave publike te koncesionit/PPP, për të cilat nuk është bërë njoftim publik se do të zhvillohen, nuk janë vijim i një procedure koncesionare të identifikuar dhe nisur, apo nuk janë parashikuar për t’u financuar nëpërmjet buxhetit të miratuar të vitit zgjedhor”, thuhet në propozimin e Cakajt.

Kjo shtesë në vendimin e Komisionit Rregullator i bashkohet edhe ndryshimeve që më herët ishin përpiluar në draftin e hartuar nga ekspertët e KQZ, duke i ndaluar qeverisë që ndërmarrë vendime për falje gjobash, por edhe privimin e pjesëmarrjes për kryeministrin, ministrat, deputetët e krerët e lartë politik të administratës që të marrin pjesë në aktivitete, ku inaugurohen apo inspektohen investime me interes publik.

Në këtë mbledhje, Komisioni Rregullator miratoi edhe projektvendimin “Për rregullat dhe modalitetet për llogaritjen e vlerës monetare të dhurimeve në natyrë ose shërbimeve, huave dhe kredive për qëllime zgjedhore ose politike të përfituara nga partitë dhe kandidatët gjatë fushatës zgjedhore”. Me anë të këtij akti tentohet që të përcaktohen rregullat dhe modalitetet për shpenzimet gjatë fushatës.