Lëvizja Vetëvendosje: Jemi gati për referendumin që do të ndodhë në këto zgjedhje

Lëvizja Vetëvendosje zhvilloi dje një mbledhje me qendrat e saj, në të cilën morën pjesë kryetari Albin Kurti, sekretarja organizative, Vlora Haxhimehmedi dhe koordinatori i qendrave, Valon Hoti.

Siç bëhet e ditur në komunikatën e VV-së, në pjesën e parë të mbledhjes, kryetari Kurti foli rreth zhvillimeve të fundit politike, me theks të veçantë zgjedhjet që priten të zhvillohen së shpejti.

Teksa pritet vendimi zyrtar i Gjykatës Kushtetuese, Lëvizja Vetëvendosje kërkon që data e mbajtjes së zgjedhjeve të jetë më e afërta e mundshme.

Po kështu, LVV njoftoi se strukturat e saj organizative janë gati për referendumin që do të ndodhë në këto zgjedhje.

Në këtë takim po ashtu u fol edhe për rëndësinë e madhe që ka vota e emigrantëve.

“Shteti i Kosovës, përmes institucioneve kompetente, duhet ta bëjë sa më të lehtë mundësinë e votimit nga mërgata, e jo t’ua vështirësojë një gjë të tillë, siç është bërë në të kaluarën. Pas këtyre diskutimeve mbledhja vazhdoi me çështjet organizative. Viti 2020, përkundër vështirësive që ka pasur për shkak të pandemisë e zhvillimeve të tjera në vendin tonë, cilësohet si i suksesshëm organizativisht për organizatën tonë.

Në këtë vit, përmes procesit të brendshëm zgjedhor, kemi arritur të konsolidojmë një pjesë të madhe të strukturave tona organizative, teksa vitin po e përmbyllim me rreth 10 mijë anëtarësime të reja e me fitoret plebishitare në komunën e Besianës dhe në veriun e Mitrovicës.

Lëvizja Vetë vendosje dhe strukturat e saj organizative janë gati për referendumin që do të ndodhë në këto zgjedhje.

Ndryshimi aq shumë i nevojshëm dhe i kërkuar nga populli, nuk ka asnjë arsye të mos lejohet që të ndodhë”, thuhet në komunikatën e VV-së.

Lexoni gjithashtu:

​Vjosa Osmani apel aleatëve ndërkombëtarë: Kosova ka nevojë ende për ndihmën tuaj

Përgatitja për zgjedhje, kreu i LDK-së: Javën e ardhshme do kemi emrin e kandidatit për kryeministër