Kosova siguron 500 mijë vaksina kundër COVID-19

Kosova ka siguruara 500 mijë vaksina anticovid nga kompania Pfizer. Lajmi është bërë i ditur nga ministri në detyrë i Shëndetësisë Armend Zemaj, i cili thotë se konfirmimi për sigurimin e kësaj sasie është dhënë nga përfaqësuesit e kompanisë Pfizer.

“Në kuadër të angazhimeve konkrete për sigurimin e vaksinave kundër COVID-19, dëshiroj të ndaj me qytetarët informatën se kemi siguruar 500 000 vaksina kundër kësaj sëmundje nga kompania Pfizer. Konfirmimin për sigurimin e këtyre vaksinave na e kanë dhënë përfaqësuesit e Pfizer gjatë një takimi virtual të mbajtur sot me ta. Siç e kemi bërë të ditur edhe më herët, MSh ka qenë e angazhuar prej muajsh në shumë drejtime për sigurimin e vaksinës kundër COVID-19, me qëllim të përmbushjes së obligimeve që kemi ndaj qytetarëve dhe ruajtjes së shëndetit publik të tyre. Qeveria e Kosovës dhe Ministria e Shëndetësisë mbesin të përkushtuara që qytetarëve tanë t’u sigurojmë mbrojtje përmes vaksinimit gjithëpërfshirës kundër Covid-19”, ka shkruar Zemaj në “Facebook”.

Ai thotë edhe se krahas kësaj, Kosova do të marrë nga mekanizimi Covax edhe 360 000 vaksina falas për 20 për qind të popullatës.

“Vaksina do të sigurohen për të gjitha grupet e popullatës që duhet të mbulohen me vaksinim sipas projeksioneve të IKSHPK-së.Vaksina kundër COVID-19, do t’u jepet falas qytetarëve të vendit tonë”, ka shkruar Zemaj.

Ministria e Shëndetësisë së Kosovës një ditë më parë njoftoi se numri total i viktimave nga COVID-19 ka shkuar në 1 351.

“Numri total i rasteve pozitive është 52.134 raste nga 188.138 persona të dyshimtë në virusin SARS-CoV-2 dhe 1.351 raste të vdekjes”, njoftoi MSH-ja.