Ministri i Jashtëm i Greqisë i telefonon Kryeministrit Rama

Ministri i Jashtëm i Greqisë, Nikos Dendias thotë se ka zhvilluar një bisedë telefonike me Kryeministrin, Edi Rama. Z. Dendias në një postim në profilin e tij në  Twitter shprehet se në këtë bisedë ka diskutuar me z. Rama mbi “zhvillimet më të fundit në rajon”.

Telefonata e Dendias vjen pak ditë pas hyrjes në fuqi të dekretit presidencial për zgjerimin me 12 milje në detin Jon por gjithashtu ajo është dhe në kuadër të një serie telefonatash që kreu i diplomacisë greke ka zhvilluar me disa vende fqinje dhe aleate.

“Pata një bisedë telefonike me Kryeministrin e Shqipërisë, Edi Rama. Diskutuam për zhvillimet më të fundit në rajon”, shkruan ministri i Jashtëm i Greqisë.

Σε τηλεφωνική επικοινωνία με τον Πρωθυπουργό της Αλβανίας, @ediramaal, συζητήσαμε για τις πρόσφατες περιφερειακές εξελίξεις – I spoke by phone to #Albania PM @ediramaal. Recent regional developments in focus. pic.twitter.com/NQKIsNApvf

— Nikos Dendias (@NikosDendias) January 5, 2021

Çështja e kufirit detar mes dy vendeve vazhdon të jetë një temë e nxehtë mes Shqipërisë dhe Greqisë që pas rrëzimit të marrëveshjes së vitit 2009 nga Gjykata Kushtetuese. Së fundmi, qeveritë e dy vendeve kanë rënë dakord që këtë çështje ta zgjidhin në Gjykatë Ndërkombëtare të Hagës.

Pak ditë më parë, ministri i Jashtëm i Greqisë, Nikos Dendias i ka telefonuar Olta Xhaçkës, ministres së re të Jashtme të Shqipërisë. Gjatë bisedës, z. Dendias shprehu vullnetin e vendit të tij për të forcuar më tej marrëdhëniet mes Greqisë dhe Shqipërisë dhe bashkëpunimin për të zgjidhur sfidat e përbashkëta.