Kryebashkiaku i Divjakës: Jemi jashtë çdolloj rreziku për përmbytje

Kryetari i Bashkisë së Divjakës, Fredi Kokoneshi thotë se janë marrë të gjitha masat që në territorin e njësisë lokale që ai drejton të mos ketë përmbytje.

Duke folur në një intervistë për Euronews Albania, z. Kokoneshi tha se situata është nën kontroll dhe bëri me dije se ka vetëm një familje që është evakuuar për t’i paraprirë çdo rreziku gjatë natës.

“Presim që në orët në vijim nga sasia e madhe e reshjeve dhe nga informacioni nga baseni i Elbasanit pritet të ketë një sasi të shtuar të ujit në lumin Shkëmbin. Kemi marrë të gjitha masat dhe puna e dimrit bëhet në kohë të thatë. Kemi bërë rehabilitimin e të gjithë argjinaturës së lumit dhe e kemi ngritur mbi 1.5 m dhe jemi jashtë çdolloj rreziku”, u shpreh ai.

Z. Kokoneshi duke iu bashkuar thirrjes së bërë nga zv.kryeministri Erion Braçe u kërkoi banorëve që kanë bagëti pranë shtratit të lumit, që t’i largojnë në një vend më të sigurt.

“Do ta monitorojmë situatën gjatë natës. Kemi marrë masat në çdo rast emergjente por mendojnë se nuk do të kemi problem. Mendoj që nuk do të ketë dëme në Bashkinë e Divjakës. Kemi vetëm një familje që ka ndërtuar brenda rrezes së shtratit të lumit dhe e kemi zhvendosur”, shtoi z. Kokoneshi.