Manastirliu: Mësimi në universitete online, fluturimet me Britaninë e Madhe të pezulluara deri më 1 shkurt

Ministrja e Shëndetësisë, Ogerta Manastirliu, gjatë një konference së bashku me anëtarët e Komitetit Teknik të Ekspertëve, u shpreh se masat anti-COVID në vendin tonë do të qëndrojnë të njëjta deri në një urdhër të dytë. 

Ministrja njoftoi se kufizimet e popullatës do jenë nga ora 22:00 e mbrëmjes deri në 06:00 të mëngjesit, si dhe mësimi në universitete do të vijojë online.

“Komiteti Teknik i Ekspertëve ka vlerësuar mbi baza dinamike të situatën dhe ka marrë vendim që të vijojnë të mbeten në fuqi masat e kufizimit të popullatës nga ora 22:00 e mbrëmjes deri në orën 06:00 të mëngjesit. Do të mbetet në fuqi kufizimi për pezullimin e aktiviteve për baret dhe restorantet nga ora 22:00 deri në 06:00 të mëngjesit. Këtu përjashtohet shërbimi në banesë”, tha ajo.

 “Mësimi në universitete do të jetë online deri në një urdhër të dytë”, shtoi ajo më tej.

Ministrja sqaroi se fluturimet me Britaninë e Madhe do të jenë të pezulluara deri më 1 shkurt.

“Komiteti ka marrë vlerësimin që fluturimet me Mbretërinë e Bashkuar do të mbeten të pezulluara deri në datën 1 shkurt “, u shpreh Manastirliu.

Manastirliu ndër të tjera theksoi se nuk kemi asnjë situatë alarmante, sa i përket pandemisë. 

“Pacientë të shtruar në spitale tona COVID, ballafaqohemi me një rritje të rasteve. Rritja e numrave është një rritje e qëndrueshme, nuk kemi një situatë alarmante”, u shpreh ministrja Ogerta Manastirliu.