Inter mposht Juventusin, zikaltrit mundën 2-0 kampionët në fuqi, zonja e vjetër pa identitet 

Inter arriti që të merrte një fitore të madhe në takimin me kampionët në fuqi të Juventusit.

Zikaltrit mundën me rezultatin 2-0 zonjën e vjetër, që edhe një herë tjetër dëshmoi se këtë sezon ka probleme dhe nuk është e njëjta skuadër si në vitet e fundit.

Ekipi i Antonio Kontes ishte agresiv dhe e gjeti rrugën e rrjetës me Arturo Vidal, i cili me statusin e një ishi ndëshkoi bardhezinjtë.

Juventus dukshëm tregoi vështirësi në gjetjen e hapësirave duke e vënë në shumë pak raste në vështirësi portierin Handanovic. Në pjesën e dytë Inter i dha dhe goditjen finale, me Barrella që finalizoi një kundërsulm të shpejtë.

Një goditje e madhe për Juventusin që këtë edicion nuk shihet më si favoriti kryesor për titull. Inter në anën tjetër, pa impenjime në arenën ndërkombëtare do të provojë të rikthejë titullin pas një dekade mungesë, por në garë, do duhet të fitojë ndaj Milanit, që për momentin ndodhet në krye të klasifikimit.