Vetingu, shkarkohet nga detyra gjyqtari i GJKKO-së, Bib Ndreca

Komisioni i Pavarur i Kualifikimit ka shkarkuar nga detyra gjyqtarin e Gjykatës së Posaçme Kundër Korrupsionit dhe Krimit të organizuar, Bib Ndreca.

Shkarkimi i gjyqtarit erdhi pasi KPK konstatoi probleme sa i takon pasurisë.

Shkarkimi i një anëtari të GJKKO-së vjen në një kohë kur kjo gjykatë ka vakanca sa i takon trupës se gjyqtarëve.

Ndërkohë, KPK ka konfirmuar në detyrë gjyqtaren e Vlorës, Elona Mihali. 

Në një lidhje të drejtpërdrejt, gazetari i Euronews Albania, Eni Ferhati tregoi se edhe pse seanca dëgjimore për subjektin Bib Ndrecaj kishte përfunduar para një viti, Komisionit të Pavarur të Kualifikimit ju desh një kohë e gjatë të merrte vendimin e shkarkimit të gjyqtarit të posaçëm.

“KPK ka gjetur bilance negative sa i takon kriterit të pasurisë, ndërkohë që ka renditur si të pajustifikuar një makinë prej 12 mijë euro që zotëronte gjyqtari Bib Ndrecaj dhe që sipas deklarimit të tij i është bërë dhuratë nga vëllezërit,” – tha gazetari Ferhati teksa theksoi se KPK ka parë me dyshim dhe pasuritë e vëllezërve të Ndrecajt.

Ai sqaroi gjithashtu se gjyqtari pretendon të ketë dokumente që vërtetojnë të kundërtën e asaj që thotë Komisioni i Pavarur i Kualifikimit duke kërkuar kësisoj dhe rivlerësimin e tij.

Si të mos mjaftonin mungesat në organikën e gjyqtarëve për shkak të mos shfaqjes së interesit për të gjykuar korrupsionin dhe krimin e organizuar tashmë kjo gjykatë ngelet me gjysmën e organikës. Nga 16 gjyqtarë të posaçëm mbeten vetëm tetë duke mos formuar dot as tre trupa gjykimi.

Gjykata e Posaçme është ajo që shqyrton të gjithë dosjet e SPAK ndërkohë që për shkak të vakancave gjatë kësaj periudhe Këshilli i Lartë Gjyqësor ka deleguar gjyqtarë nga gjykatat e tjera për disa çështje.