Zgjedhjet në Kosovë, Jeta Krasniqi: Lufta është më e ashpër mes partive politike, do ketë ‘beteja’ deri më 14 shkurt

Analistja politike, Jeta Krasniqi ka komentuar në Euronews Albania listat me emrat e kandidatëve për deputetë në Kosovë.

Zonja Krasniqi u shpreh se në këto zgjedhje lufta është më e ashpër nga partitë politike për të mbajtur pas vetes kandidatë që mund t’u sjellin shumë vota.

“Shohim që këto lista ka tendencë për të ruajtur votën. Këtë herë ka një luftë më të ashpër nga partitë politike për të marrë sa më shumë vota dhe për të mbajtur brenda partive kandidatë për deputetë për të maksimizuar votën”, tha ajo.

“Ajo që do të shohim në këto ditë dhe veçanërisht në datën 20 është sesi në fakt edhe KQZ-ja do të bëjë interpretimin e Gjykatës Kushtetuese, duke ditur se kemi në listë Albin Kurtin”, u shpreh ajo.

Analistja theksoi se ende ka beteja politike deri më 14 shkurt.

“Ende ka beteja të tjera politike, deri sa të shkojmë në ditën e zgjedhjeve në 14 shkurt”, tha ajo.

Ajo shpjegoi më tej procedurën nëse KQZ nuk i jep të drejtën Albin Kurtit për të kandiduar si deputet më 14 shkurt. 

“Mbas vendimit të KQZ ka hapa të tjerë. Nëse KQZ vlerëson që Albin Kurti edhe të tjerë nuk do të jenë në listë, ky vendim do të apelohet në Panelin për Ankesa në KQZ. Nëse kjo nxjerr këtë vendim do të shkohet në Gjykatën Supreme. Nëse Gjykata Supreme jep të njëjtin vendim, mbetet ajo e Gjykatës Kushtetuese”, tha ajo.

“Vendimi Gjykatës Supreme do të jepet para se të konsolidohen listat, para zgjedhjeve”, përfundoi analistja.

Lexoni gjithashtu:

Koalicionet e munguara të 14 shkurtit, të mëdhenj dhe të vegjël presin rezultatet për të bashkëpunuar

Kandidatët për zgjedhjet e 14 shkurtit, analisti Rashiti: Kanë sfidën e certifikimit, ka edhe emra të rinj