Chelsea shkarkon trajnerin Frank Lampard

Fitorja 3-1 ndaj Lutonit në Kupën e Federatës nuk ka mjaftuar për trajnerin e Chelsea-it, Frank Lampard për të shpëtuar postin e tij si trajner.

Klubi i “Bluve të Londrës” zyrtarizoi mesditën e së hënës shkarkimin e 42-vjeçarit tetëmbëdhjetë muaj pasi pati marrë drejtimin e skuadrës.

Shkarkimi vjen një javë pas humbjes turpëruese 2-0 përballë Leicester-it çka e rrëzoi në vendin e 9-të në renditje, 11 pikë larg Manchester United-it të vendit të parë.

Chelsea Football Club has today parted company with Head Coach Frank Lampard.

— Chelsea FC (@ChelseaFC) January 25, 2021

Në vend të Lampard, shtypi britanik ka spekuluar për një angazhim të mundshëm të gjermanit Thomas Tuchel, i cili pak muaj më parë u largua nga drejtimi i Paris Saint-Germain.

Kur u angazhua në korrik të vitit 2019, Lampard nënshkroi kontratë tre-vjeçare dhe zëvendësoi në këtë detyrë italianin Maurizio Sarri.

Në sezonin e tij të parë Lampard i drejtoi blutë drejt vendit të katërt dhe një finaleje të Kupës së Federatës (FA).

Prej 12 dhjetorit blutë kanë pësuar pesë humbje në tetë ndeshje.

Fillimisht Lampard nuk mundi të transferojë lojtarë për shkak të një dënimi që kishte Chelsea-i, por më pas shpenzoi mbi 250 milionë euro për 7 lojtarë, si Ben Chilwell apo Kai Havertz. Kjo ishte shuma më e madhe e parave shpenzuar ndonjëherë në nisje sezoni që prej vitit 2017.

Po kështu në statistikat e përgjithshme Lampard figuron më poshtë se trajnerët e tjerë që kanë drejtuar Chelsea-in. Ai ka mundur të mbajë një mesatare prej 1.67 pikësh për ndeshje, ndër më të paktat e periudhës së Roman Abramovich – vetëm Andre Villas-Boas ka pasur përqindje më të ulët fitoresh 47.5% krahasuar me Lampard, 52.4%.

Trajnerë të tjerë si Jose Mourinho, Antonio Conte, Maurizio Sarri, Carlo Ancelotti apo Claudio Ranieri, kanë pasur që të gjithë mbi 60% fitore.