Përmbytjet, Rama: Kemi bërë bilancin, tani jemi në një fazë më pak kritike

Kryeministri Edi Rama gjatë konferencës “Ekonomia në Fokus” u shpreh se qeveria e tij ka bërë një bilanc për përmbytjet e tokave bujqësore dhe banesave, por tha se do të publikohet kur të përfundojë kjo situatë.

“Jemi në ndjekje të përditshme të situatës dhe patjetër në fund të kësaj faze, do ta bëjmë edhe bilancin publik”, u shpreh ai.

Kreu i qeverisë theksoi se aktualisht problemi kryesor janë rrëshqitjet e dherave dhe se situata e përmbytjeve është nën kontroll. 

“Kemi bërë bilancin për fazën më kritike dhe tani jemi në një fazë më pak kritike. Sigurisht që po ndjekim me shumë vëmendje por është krejtësisht në nivele të arsyeshme duke pasur parasysh intensitetin e madh të reshjeve. Problemi kryesor janë rrëshqitjet e dheut, pas shumë ditësh reshje në disa akse, ku po punojmë ditë e natë. Për sa i përket përmbytjes së tokave ato janë minimale për momentin”, tha ai.

Në këtë konferencë ishin të pranishme ministrja e Bujqësisë dhe Zhvillimit Rural, Milva Ekonomi dhe Frida Krifca, Drejtore e Përgjithshme e Agjencisë për Zhvillim Bujqësor dhe Rural.