“Fushatat” e bujqësisë, buxheti rritet 20%, nisin subvencionet e naftës për fermerët

Bujqësia ka marrë vëmendjen e qeverisë këtë vit, e cila e ka pozicionuar sektorin tek një ndër 5 shtyllat që do të mbështesin buxhetin 2021.

Me një buxhet 12,9 mld lekësh, që mbulon rreth 20 për qind të PBB-së, 1 mld lekë iu është dedikuar fermerëve që do përfitojnë subvencionim të naftës, por me kushtin që të jenë të pajisur me NIPT fermeri. Skema synon të mbështesë 70 mijë fermerë, edhe pse  të dhënat e deritanishme flasin për 47 mijë NIPT-e.

Reflektimi për të zhvilluar prodhimet në agro-kulturë vjen para vitit zgjedhor, teksa gjatë viteve të fundit jo pak fermerë kanë hequr dorë nga fermat, dhe kanë shprehur pakënaqësi për mungesën e tregjeve dhe skemat kombëtare që nuk kanë funksionuar.

Lideri i opozitës, Lulzim Basha ndërkohë ka sjellë në vëmendje premtimin e hershem të Partisë Demokratike për 100 milionë euro për bujqësinë, dhe mbështetjen nga shteti si të vetmen rrugë që fermeri të konkurroje me çmimin dhe cilësinë.

Mbështetje për bujqësinë japin edhe disa agjenci dhe donatorë të huaj, që kryesisht kreditojnë apo japin grante për projekte që synojnë përmirësimin e teknologjisë dhe agro-turizmit.