Aeroporti Ndërkombëtar i Tiranës njofton ulje të tarifës së pasagjerit

Aeroporti Ndërkombëtar i Tiranës, (TIA) njoftoi se ka vendosur të ulë tarifën e pasagjerit nga 12.5 euro në 10 euro, e cila do të hyjë në fuqi me ndryshimin e kontratës koncensionare të vitit 2004.

TIA deklaroi se kjo do të sjellë një ulje të “dukshme” të çmimit të biletave të avionit dhe pritet të ketë ndikim pozitiv dhe në rritjen e numrit të fluturimeve dhe destinacioneve.

Vendimi, sipas njoftimit për shtyp nga aeroporti, u mor më 18 dhjetor 2020, kur kompania Kastrati Group, mori në zotërim 100% të kapitalit aksionar të TIA-s, pas blerjes së aksioneve nga kompania kineze “Real Fortress Limited”.

“Si pjesë e ndryshimeve të Kontratës së Koncesionit, TIA njofton se një paketë e plotë investimesh, të cilat arrijnë një total prej afërsisht 100 milionë Euro do të jetë në vëmendjen e menaxhimit duke patur në fokus, zgjerimin e kapacitetit akomodues të aeroportit me 6 milionë pasagjerë në vit, zgjatimin e pistës, përmirësimin e plotë të infrastrukturës së aeroportit dhe përmirësimin e ndjeshëm të cilësisë së shërbimeve,” sqarohet në deklaratën e Tirana International Airport.

Kompania njoftoi gjithashtu planet për liberalizimin e Ground Handling Services (Shërbimet në Tokë) dhe liberalizimin e tregut të karburantit të avionëve, që sipas saj do të sjellë kosto më të ulët në çmimin e këtij karburanti.

“Të gjitha këto ndryshime të rëndësishme do kenë një efekt të menjëhershëm në tërheqjen e linjave të tjera “low cost”, përfshirë Ryan Air, dhe rrjedhimisht do të kenë efekt në uljen e çmimit të biletës që paguajnë udhëtarët e TIA-s,” përfundon TIA.