Rëndohet situata në Shkodër, 3000 hektarë tokë nën ujë, bashkia kërkon sërish shpalljen e emergjencës

Pas reshjeve të rena gjatë mbrëmjes së të dielës dhe mëngjesit të së hënës situata e përmbytjeve në territorin e Shkodrës është rënduar sërish.

Sipas baskisë më shumë se 3000 hektarë tokë ndodhet nën ujë. Situata vazhdon të jete problematike në njësitë administrative Ana e Malit dhe Dajç. Kryetarja e bashkisë së Shkodrës Voltana Ademi vijon të këmbëngulë në shpallen e gjendjes së emergjencës.

“Kemi dy metër ujë ne toke bujqësore, kemi 70 centimetër ujë rreth banesave, në Obot, kemi rrugën e Goricës, vijojnë problemet në Dajç, kemi prezencë më të madhe me ujin në Belaj sepse aty shkarkohet pjesa më e madhe e prurjeve,” – tha Ademi.

Ademi u shpreh se institucioni që ajo drejton ka nisur procedurat për përdorimin e fondit të emergjencës pasi deri tani nuk ka marrë asnjë ndihmë nga qeveria dhe ministria e Bujqësisë pasi dëmi ekonomik është i madh.

“Po prokurojmë mbi 150 tonë në këtë moment nga fondet e Bashkisë me një total prej rreth 150 milionë lekësh nga fondi i emergjencave civile. Të kryejmë këtë parti të parë e të vijojmë më pas sërish duke harxhuar gjithë fondin,” – vijoi kryetarja e Bashkisë Shkodvr.

Kryetarja e bashkisë bën thirrje që të merren masa pasi situata mund të zgjasë deri në pranvere.