Zgjerohet harta e përmbytjeve në Shkodër, prezencë uji në oborret e 110 shtëpive

Situata me përmbytjet në zonën e Shkodrës vijon të jetë shqetësuese teksa edhe ditën e martë autoritetet raportuan për përkeqësim të gjendjes.

Të dhënat e raportuara në orën 8:00 flasin për rritje të ndjeshme të nivelit të ujit në njësinë administrative Dajç.

Hidrometri i Dajçit shënoi 6.69 metra, me një rritje prej 9 centimetra, 25 centimetra në vendin e quajtur Urrela të Shirqit në krahasim me një ditë më parë.

Në zonat e përmbytura vijojnë të jenë në gatishmëri mjetet ushtarake, të cilat për rreth katër javë ndihmojnë banorët me orare 07:45-16:00 për të lëvizur.

Sipas të dhënave:

• Janë 1450 ha tokë bujqësore e përmbytur (fshatrat Darragjat, Shirq, Mushan, Suka-Dajç, Belaj,Rrushkull, Samrish i Ri, Pentar-zona fushore);
• Rrugë të bllokuara: Darragjat-Shirq;
• Ka prezencë uji 20 centimetra në rrugën Belaj– Pentar;
• Në disa toka bujqësore lartësia e ujit arrin 2 metra;
• Prezencë uji në oborret e 110 shtëpive;
• Të gjitha zonat kanë energji elektrike, por në disa raste ka shkëputje;

Lexoni gjithashtu:

Përkeqësohet situata e përmbytjeve, Bashkia Shkodër kërkon ndihmë