”Amerika është kthyer”, Biden njofton ndryshime në politikën e jashtme të SHBA

“Amerika është kthyer”. Ka qenë ky mesazhi që presidenti Joe Biden i ka drejtuar botës në fjalimin e parë mbi politikën e jashtme.

Gjatë fjalimit, Biden e ka vënë theksin tek përballja me “ambiciet në rritje të Kinës”, “vendosmërinë e Rusisë” dhe sfidat globale si klima dhe pandemia e COVID-19.

“Amerika është kthyer. Diplomacia është kthyer në qendër të politikës sonë të jashtme. Sikurse e kam thënë në fjalimin e inaugurimit, ne do ripërtërijmë aleancat dhe do të angazhohemi me të gjithë botën jo për sfidat e së djeshmes, por për ato të sotme e të nesërme”, deklaroi presidenti Joe Biden.

Biden foli edhe për qëndrimin e SHBA ndaj luftës në Jemen. Mbi 100 mijë persona kanë vdekur gjatë konfliktit 6-vjeçar dhe miliona të tjerë po vdesin urie apo janë zhvendosur.

“Kjo luftë duhet të marrë fund dhe për të nënvizuar angazhimin tonë do t’i japim fund mbështetjes për operacionet ofensive në Jemen, përfshirë shitjen e armëve”, tha ai.

Biden njoftoi gjithashtu se do të ndalë planet për tërheqjen e trupave amerikane nga Gjermania. Atje ndodhen mbi 30 mijë ushtarakë në baza të ndryshme të vendit dhe administrata e mëparshme planifikonte t’i zhvendoste.

Lexoni gjithashtu:

Donald Trump refuzon kërkesën e demokratëve për të dëshmuar në Senat

Kompania ‘Johnson & Johnson’ i kërkon FDA-së të autorizojë vaksinën e saj

Josep Borrell vizitë tre ditore në Moskë, do të takohet me Sergei Lavrov