Përhapja e pandemisë, Gjinushi: E nevojshme të riforcohen kufizimet për të paktën dy javë

Kryetari i Akademisë së Shkencave, Skënder Gjinushi bëri sot thirrje për riforcim të kufizimeve dhe respektim të tyre për së paku dy javë si një përpjekje për të frenuar prhapjen e pandemisë se covid-19.

Thirrjen e tij, Gjinushi e bëri gjatë konferencës shkencore “Pandemia dhe rimëkëmbja-strategjitë e përballjes dhe pritshmëritë e zhvillimit” e organizuar nga Kuvendi dhe Akademia e Shkencave.

“Kjo periudhë dha disa karakteristika, prapambetja adisproporcioni që kishin vendet e lindjes dhe të perëndimit në fazën e parë gjatë së cilit niveli i përhapjes ndryshonte më herë, erdhi duke ndryshuar, ndërsa treguesi i mortalitetit në fazën e parë kapte shifra të frikshme 13-17% në këtë fazë ra ndjeshëm dhe sot mesatarja e përgjithshme është nën 3%,” – tha Gjinushi duke cituar rezultatet e një studimi të kryer nga Akademia në vazhdimësi.

Sipas kryetarit të Akademisë pavarësisht nga perceptimi, vdekshmëria në Shqipëri “prej dhjetorit është në nivelin 1% nga 2.2% që ishte mesatarja e saj deri në dhjetor,”

“Kurba e përhapjes së pandemisë prej shtatorit e deri më sot, kudo ka formën e një vargmali me dy maja një në mes të nëntorit e një në fillim të janarit, në tërësi në Evropë në nëntor ishte maja më e lartë e përhapjes, ndërsa në vende të tjera si Britani dhe te ne është më e lartë maja e dytë. Në të gjitha vendet ka nisur zbritja […] ndërsa ne sot ndodhemi ende në majë dhe presim fillimin e uljes nga vala e dytë dhe këtu bëjmë përjashtim nga rregulli i përgjithshëm kjo sepse në rajon në përgjithësi dhe te ne në veçanti zbatohen kufizime dhe masa më të buta se në pjesën tjetër të Evropës dhe se masat nuk respektohen sa duhen,” – shtoi më tej Gjinushi.

Kryetari i Akademisë më tej këshilloi se për këtë situatë “për të përshpejtuar uljen është e nevojshme të riforcohen kufizimet dhe respektimi i tyre për së paku një periudhë dyjavore”.

Gjatë konferencës, me dy sesione, u përfshinë në diskutime Kryetari i Kuvendit Gramoz Ruçi, Drejtuesi i Bankës së Shqipërisë, Gent Sejko, ekspertë si Adrian Civici, apo Anastas Angjeli dhe përfaqësues të qeverisë dhe parlamentit.