Hungari, mbyllet radioja anti-Orban, Gjykata i heq licencën zërit kritik të qeverisë nacionaliste

Një gjykatë në Hungari vendosi të martën heqjen e licencës për një stacion radiofonik opozitar, duke i mbyllur gojën një tjetër organi mediatik kritik ndaj qeverisë nacionaliste.

Autoriteti mediatik i vendit kishte paralajmëruar që në shtator se nuk do t’ia rinovonte licencën stacionit “Klubradio” për shkak të atyre që i cilësonte “shkelje sistematike” përgjatë lejes 7-vjeçare që skadon të dielën e ardhshme, më 14 shkurt.

Për rrjedhojë, “Klubradio”, që transmeton prej 19 vjetësh me programe dhe të ftuar që shpesh herë kritikojnë politikat e qeverisë, do të detyrohet të fikë mikrofonat.

“Ky vendim tregon se sot në Hungari një autoritet i vetëm ka të drejtë të japë vendime të ndryshme për subjekte të njëjta, në rrethana të njëjta. Kjo do të thotë se kushdo që është i pranueshëm për pushtetin do ta marrë rinovimin e lejes së transmetimit dhe kushdo që nuk është nuk do ta marrë atë,” – u shpreh Andras Arato, drejtor i “Klubradio”.

Kontrolli në rritje që kryeministri Viktor Orban po ushtron ndaj mediave në Hungari është një çështje që ka shqetësuar shumë BE-në, që vlerëson se në këtë mënyrë vendi po përjeton një erozion të standardeve demokratike, akuzë kjo që hidhet poshtë nga qeveria.

Nën qeverisjen e Orban, mediat shtetërore janë kthyer në zëdhënëse të ekzekutivit, ndërsa media të tjera private ose janë mbyllur, ose janë blerë nga biznesmenë të afërt me qeverinë.