”Përmbytja më e madhe dhe më e gjatë në Shkodër”, Voltana Ademi apelon për shpalljen e emergjencës civile

Kryetarja e Bashkisë Shkodër, Voltana Ademi tregoi se situata e përmbytjeve në qarkun që ajo drejton është më e rëndë se në vitin 2018.

Ajo nuk la pa përmendur se as në përmbytjen e vitit 2010 nuk ka qenë kohëzgjatja kaq e madhe. Tashmë Shkodra numëron 40 ditë nën ujë.

“Unë parashikoj një situatë të Emergjencës Civile,” – tha Ademi teksa apeloi për qeverinë shqiptare dhe ministrat që të marrin përgjegjësitë.

Ajo sqaroi për Euronews Albania se sipërfaqja e përmbytur është dyfishi, uji është dashur të hiqet me pompë dhe disa familje janë evakuuar.

Për shkak të situatës së vështirë Emergjenca Civile do të mund të vijë në ndihmë që masat të merren para se niveli i ujit të arrijë në nivele dhe më kritike se aktualisht.

Ademi pohoi se stacioni i ujësjellësit të Trushit është në punë por nëse situata vijon me po të njëjtat ritme do të duhet të dalë jashtë funksionit.

“Po përdorim mjetet e ushtrisë në bashkëpunim me spitalin për të bërë transportin e sigurt të një familje të infektuar me COVID nga një banesë në një tjetër,” – tregoi kryebashkiakja e Shkodrës.

Lexoni gjithashtu: 

3655 ha tokë nën ujë në Shkodër, banorët kërkojnë ushqim për bagëtitë

Panorama e Obotit nën ujë | Fotogaleri

Rikthehen reshjet e shiut, 3700 hektarë tokë të përmbytura në Shkodër, banorët apel për ndihmë