”5 Yjet” vonojnë qeverinë, ndasi mes anëtarëve të partisë për t’i thënë ”po” Mario Draghit

‘Lëvizja 5 Yjet’ vijon të ketë probleme me kapërcimin e ndasive të thella ndaj përpjekjes së Mario Draghit për të krijuar qeverinë e re në Itali.

Pritej që ‘5 Yjet’ të zhvillonin një votim online ku anëtarët do të merrnin vendimin përfundimtar, por udhëheqja e shtyu procesin pas kundërshtimit të fortë në radhët e disa ligjbërësve.

“T’i themi ‘po’ ose ‘jo’ Draghit do të ishte shumë e thjeshtë. Na duhet të votojmë për një program,” u shpreh kreu i partisë, Vito Crimi.

Kryeministri i ri zakonisht nuk e zbulon programin e tij deri në momentin që betohen ministrat.

Edhe pse Draghit nuk i duhen votat e 5 Yjeve për të krijuar qeverinë, pasi ka mbështetjen e shumicës, Lëvizja ka numrin më të madh të ligjbërësve në të dyja dhomat e parlamentit dhe mungesa e tyre do të dëmtonte përpjekjet e 73-vjeçarit për të krijuar një aleancë të unitetit kombëtar.

Lexoni gjithashtu:

Negociatat për qeverinë e re në Itali, Salvini: Nuk vendosëm kushte, jemi të hapur

Në kërkim të formimit të qeverisë, ”Super Mario” nis konsultimet, kuadri politik në Itali i pasigurt