Reshjet e shiut kanë përmbytur akset kryesore dhe disa lagje në Shkodër dhe Vlorë

Shirat e rrëmbyeshëm gjatë natës kanë shkaktuar përmbytje në qarqet si Shkodra dhe Vlora.

Rritja e nivelit të ujit në liqenin e Shkodrës ka shkaktuar bllokimin e disa akseve kryesore në qytet dhe rrjeti i kanalizimeve ka dalë jashtë funksionit.

Gazetari i Euronews Albania, Teodor Gjerga raportoi se shtimi i prurjeve në lumin Buna kanë përmbytur 5 lagje të qytetit.

Ndërkohë një banor u shpreh se niveli i ujit në banesat e tyre ka shkuar deri në 90 cm.

“Jemi përmbytur edhe në 2010. Asnjë njeri nuk na ka ardhur për të vlerësuar dëmet”, u shpreh banori.

Më e rëndë paraqitet situata në zonat rurale të Shkodrës, ku në bazë të raportimeve të bashkisë, mbi 5000 ha janë nën pushtetin e ujit.

Edhe dhe në qarkun e Vlorës situata nuk është aspak normale, pasi shumë lagje të qytetit janë përmbytur, duke shkaktuar dëme edhe tek bizneset përreth.

Gazetarja Ebrieta Maçaj raportoi se situata më problematike është në lagjet “28 nëntori”, “Kosova” dhe “Kushtrimi”.  

Lexoni gjithashtu:

”Përmbytja më e madhe dhe më e gjatë në Shkodër”, Voltana Ademi apelon për shpalljen e emergjencës civile

3655 ha tokë nën ujë në Shkodër, banorët kërkojnë ushqim për bagëtitë

Panorama e Obotit nën ujë | Fotogaleri