Dita e fundit e fushatës në Kosovë, gazetari Franko Egro: Të gjithë në terren për vëmendjen e elektoratit

Drejtuesit e partive politike në Kosovë vijuan të jenë edhe sot në terren për të tërhequr vëmendjen e elektoratit teksa sot ishte dita e fundit e fushatës zgjedhore.

Gazetari i Euronews Albania, Franko Egro raportoi se partitë kanë shumëfishuar daljet e tyre televizive. Elementët kryesor të partive politike gjatë kësaj fushate të shkurtër zgjedhore kanë qenë çështjet ekonomike, luftës ndaj korrupsionit dhe mirë-qeverisjes.

“Nuk mbetet mënjanë edhe çështja e dialogut me Serbinë, e cila do të jetë sfidë madhore e çdo qeverie që do të dalë pas zgjedhjeve të 14 shkurtit,” – u shpreh gazetari Egro.

Sondazhet kanë nxjerrë në avantazh për nga popullariteti Lëvizjen Vetëvendosje e pas saj Partinë Demokratike të Kosovës.

“Pas këtyre dy partive janë Lidhja Demokratike dhe Aleanca për Ardhmërinë e Kosovës, por mbeten vetëm sondazhe dhe duhet nënvizuar se kryetarët e partive që nuk dalin të parat, thonë se nuk u duhet besuar këtyre sondazheve,” – tha Egro.

Gazetari Egro kujtoi se brenda muajit prill pritet që të zgjidhet edhe çështja e postit të Presidentit dhe se drejtuesit e partive politike janë shprehur që për këtë çështje vendimtare do të jenë zgjedhjet parlamentare.

Deri më sot janë kandidatë të deklaruar Vjosa Osmani dhe Ramush Haradinaj. Nëse e para ka marrë mbështetjen e Lëvizjes Vetëvendosje, për Haradinajn mbështetja e vetme aktualisht ka ardhur vetëm nga partia e tij Aleanca për Ardhmërinë e Kosovës. Kështu çështja për Presidentin mbetet në diskutim nga rezultati i zgjedhjeve dhe numrat që do të mund të fitojnë partitë.

Lexoni gjithashtu:

Nënshkruhet memorandum i bashkëpunimit, institucionet në Kosovë garantojnë zgjedhje të lira dhe demokratike