Danimarkë, shmanget sulmi terrorist, 13 persona në pranga si të ndikuar nga ISIS

Të paktën 13 persona janë arrestuar në Danimarkë nën dyshimin se po përgatisnin sulme terroriste në vendin nordik dhe Gjermani.

Shërbimet daneze të sigurisë bënë me dije se kishin ndaluar 7 persona gjatë fundjavës dhe 6 të tjerë në 24 orët e fundit, në kuadër të një operacioni të vetëm.

Gjatë kontrolleve agjentët gjetën mjete luftarake si lëndë eksplozive, detonatorë dhe armë zjarri.

“Këto janë zhvillime shqetësuese. Kemi gjetur një flamur të ISIS që konfirmon dyshimet tona se këta njerëz frymëzoheshin nga Islami radikal dhe për fat të keq, ajo që shohim është se kërcënimi terrorist në vendin tonë mbetet serioz,” – ka thënë Flemming Drejer, shef i policisë daneze.

Edhe autoritetet në Gjermani arrestuan një person në lidhje me të njëjtin rast. Gjatë kontrolleve të kryera ato sekuestruan 10 kg barut dhe disa metra fitil.