Policia e Kapitolit arreston një person të armatosur në Parkun e Kongresit

Një person i armatosur është arrestuar sot në një park pranë kompleksit të Kongresit amerikan në Uashington, njoftoi policia.

Burri ishte në një park përpara ndërtesave ku ndodhen zyrat e senatorit, përballë stacionit të trenit, tha Policia e Kapitolit në një deklaratë.

Policia deklaroi se ka kontrolluar si masë paraprake zonën ku është arrestuar i dyshuari, si dhe sendet e tij dhe se nuk besojnë se ka ende një kërcënim, raporton Zëri i Amerikës (VOA).

Udhëheqësi demokrat i Dhomës së Përfaqësuesve, Hakeem Jeffries, tha në një deklaratë se i dyshuari ishte i armatosur rëndë dhe se siguria e anëtarëve të Kongresit dhe stafit të tyre është parësore.

“Armët e luftës nuk kanë vend në rrugët tona”, tha Jeffries.

Mbajtja e armëve në vende publike është e ndaluar në Uashington dhe në kompleksin e Kongresit, sipas Zërit të Amerikës.