​Fatmir Limaj uron LVV-në: Është koha për punë dhe qeveri stabile

Kryetari i Nismës Socialdemokrate, Fatmir Limaj ka uruar Lëvizjen Vetëvendosje për fitoren e arritur në zgjedhjet e të dielës. Me një dalje para mediave, z. Limaj u shpreh se do të vazhdojë të vëzhgojë punën e forcës politike, e cila mori besimin dhe vullnetin e qytetarëve.

“T’i uroj fituesit e zgjedhjeve besimin e popullit. Nuk ka asnjë arsye, është koha e punës. Ne do të vëzhgojmë besimin që keni marrë nga populli. Është koha për punë dhe qeveri stabile”, tha ai.

Pavarësisht se nuk arriti të kalojë pragun zgjedhor prej 5%,  Fatmir Limaj tha se Nisma do të vazhdojë punën për të promovuar vlerat kombëtare e ato njerëzore.

“Ne si Nismë do të vazhdojmë fuqishëm dhe të jemi zëdhënës i atyre aktivistëve. Janë mishëruar me kauzën tonë. Shumë vajza e djem të lindur pas luftës ndihen çlirimtarë. Këtë radhë nisma nuk do të jetë pjesë e parlamentit. Por, në asnjë mënyrë nuk do të ndal zërin për promovimin e kauzës tonë për promovimin e vlera kombëtare dhe njerëzore. Kosova është mbi të gjitha dhe zëri i çlirimtarëve do të rritet dhe promovohet”, ka thënë ai.