Dialogu Kosovë-Serbi, Nesho: Kurti e ka të qartë që në politikë ka kompromise

Ish- ambasadori i Shqipërisë në Organizatën e Kombeve të Bashkuara, Agim Nesho tha se nuk mendon se Albin Kurti është kundër dialogut Kosovë-Serbi por bisedimet nuk mund të zhvillohen njësoj si në vitet e fundit.

“Kurti kërkon që të dyja palët para se të negociojnë të kenë të qartë që të arrijnë atë marrëveshje normalizuese, gjithëpërfshirëse por që njohja e Kosovës të jetë një kusht i padiskutueshëm,” – tha Nesho.

Sipas tij Albin Kurti si kryeministër i Kosovës është i aftë t’i realizojë bisedimet me Serbinë duke bërë dhe kompromise të caktuara por jo në bazë të lëshimeve.

“Në politikë ka dhe kompromise,” – kështu u shpreh diplomati Nesho teksa theksoi se dhe Albin Kurti e ka të qartë këtë gjë.

Nëse letra e urimit që pritet të vijë nga presidenti i SHBA-së Biden, për përvjetorin e pavarësisë së Kosovës ka ndonjë kërkesë specifike që duhet zbatuar nga shteti i Kosovës, sipas Neshos është diçka që duhet marrë në konsideratë nga kryeministri i ri.

“Qeveria Kurti është shumë e qartë në këtë drejtim. E kupton që çështja e njohjes së Republikës së Kosovës i takon në mënyrë prioritare Serbisë dhe ata janë të hapur për çdo kompromis që nuk prek integritetin dhe të ardhmen e Republikës së Kosovës,” – përfundoi Agim Nesho.